Friday, February 18, 2011

الشعب يريد تكريم الرئيس !



طب والله حاجة تغيظ !
يعني بعد اللي عملناه كله ده ييجي طائفة زي دي ويتهمونا اننا السبب ف اللي بيجرى ” للريس ” .. طب اشطة مين بقى السبب ف اللي جرالنا 30 سنة تحت حكمه !
وفي ناس تقولك ايه “ استغفلوه وماكانش عارف اللي بيحصل ولا بيوصله كل اللي بيجرى ” ..! .. استغفلوه ! ليه أهبل وبريالة مثلا ؟! .. ولا كبر وخرف وبيتضحك عليه ؟ ! ماهو لو كده فعلا يبقى خلاص انتو جبتوا التايهة واحد اهبل هيحكمنا ازاي؟ .. او واحد مغفل هيحكمنا ازاي ؟ .. مش القانون برده لا يحمي المغفلين ! .. عاوزين تحموه وتردولوا جمايلة اللي مغرقانا ف دمنا واهاتنا والامنا ليه ؟!
الشعب يريد تكريم الرئيس صفحة نزلت على الفيس بوك قال ايه كاتبين ف الانفو بتاعتها الجوائز والميداليات اللي خدها ومش عارفة درع ايه وكلها حاجات خارجية ونسيوا يقولوا ادانا ايه داخليا بقى ، كم واحد مات وكم واحد اتقتل وكم واحد انتحر وكم واحد مش لاقي ياكل وكم واحد بيتعذب على ما يلاقي تمن اكل او دوا لعياله او على ما يوصل شغله يكون طلع عين امه واهي كل دي حاجات اساسية يعني مش بنقول كم واحد ما عندش موبايل او كمبيوتر مثلا ! ده حق العيش بس والكرامة ! حق الحياة يا اخوااااااناااا !!!

 السؤال اللي يطرح نفسه بقى وبالقوي : هو الريس يستحق التكريم فعلا؟ ولو يستحق يبقى على ايه ؟
هنا انا مش هاتكلم كتير ف كلام واضح ومعروف يعني انا بس هاعرض ردود الفعل ” المباركية ” و ” العته ” الذي يتبنوه شعارا لهم ويردود تحت مسمى ” الكرامة ” كلاما مش عارفين ايه معناه اصلا لانهم كباقي الشعب طوال 30 عاما افقدهم ” مباركهم ” كرامتهم فباتوا لا يدركون الفرق بين “مبارك ” و ” الله يبارك فيك ” ! 
قوى التضامن المباركي بتقولك :  اه طبعا انت ناسي عمل ايه ف 73 ولولاه ما كناش بقينا الوقتي وما بقيناش ف سلام وامان و و و ..  .. ممكن اكمل عليه انا بقى واقولهم ومش لاقين ناكل وبنتعذب ولا عارفين نشرب ولا نتعالج ولا حتى لاقين ارض نبنيها لينا ما هو ” عواد ” باع ارضنا للغرب علشان يحقق السلام ! 
واحد من المبروكين بيقولك  : “ سأعيش عمرى احكى لأبنائى وابناء ابنائى مأساة جندى اجبروة على التخلى عن سلاحه فى أرض المعركة سأحكى عن وطن أمتطاه الرعاع وسيروة نحو حتفه سأكشف وجه التاريخ وأعرى الحقيقه ليعرف الكل من الذى باع دم الشهداء واشترى لنفسه مجد شخصى لا يستحقه سأحكى مأساة وطنى الذى فشلوا فى استعمار ارضه .. ولكن استطاعوا إستعمار عقول أبناؤة بل وجعلوهم يذبحون وطنهم بأيديهم سأخبر الكل ان اللص ارتدى ثوب المقاتل وأشترى نصرا زائفا نسبه لنفسه “ 
أقطع دراعي ان كان فاهم يعني ايه رعاع ! 
أسيبكم انا مع باقي العبارات اللي طالعة من قلوب ” الله يبارك فيهم  ” ويحميهم ويحشرهم مع ” مباركهم”  يوم القيامة 

  • مستغربه بجد ان التليفزيون مجابش اى حاجه ولا حتى تكريم ليه .. ولا حتى نبذه عنه وعن انجازاته زى ما كان بيعمل فى يوم ميلاده .. الراجل دا فعلا ميستاهلش كدا وياريت كل الناس تعرف انه اتظلم وان ابنه والعادلى وناااااااااس كتييييييييييييييير هما السبب فى اللى وصلوا ليه .. معلش ياريس ولادك اللى بيحبوك ان شاء الله يكرموك ويحاولوا يردوا الجميل ..
  • كل اللي اقدر اقوله حسبي الله ونعم الوكيل ف كل اللي كان السبب ف اللي حصل للريس
  • الحرية الحرية ادينا خدنا الحرية وبقينا هفية للحرامية وامريكا جاية تفرض الوصية ولو روحت تشتغل تيجى البيت مش هتلااقى الولية دى بجد مش عيشة اروح على القهوة اشرب حجرين شيشة اجى القى البرادعى بيفتش عن القنابل النووية ..وادى الحرية الحرية
    من تأليفى الخاص يرجى حفظ الحقوق :P
  • احنا اسفين يا ريس على الشباب الى ما بيعرفوش امتك امتى الناس تفوق وتقدر الراجل ده ما حدش شاف منه حاجه وحشه الراجل ده لازم كرامته ترجع حررررررررام والله انا مكنتش متخيل ان السيد الرئيس يتهان من شعبه بالطريقه ده الى عملو كده دول مش مصرين المفروض المصرى يحس بأيمه ابوة انا لو ابويا مش هقدر اقولو ارحل
  • اذا كان مبارك لص فكلنا لصوص واذا كان خائنا فكلنا خونة واذا كان شيطانا فكلنا شياطين واذا كان مبارك دافع وحارب ورفع علم مصر في 73 فكلنا لم يكن موجود ربنا لا تؤاخذنا بما فعل السفهاء منا …. امين 
  • ابى وحبىبى اتقدم بالاعتذار لك عن كل ما حدث اتحدث بللسان كل انساىن ىملك قلب واحساس اننا نحبك ولا نتمنى لك اى سؤ وباذن الله ستقوم بالسلامه ياريت كلنا ندعى له


كفاية كده علشان ما تدعوش عليا انا 
  ….. 

اخيرا 
“ حقا لازال هناك أناس لا يستحقون سوى مبارك ” !
dolly alashker

0 comments: