Wednesday, May 18, 2011

هذا وقد قرر الشعب .. الآتي .. !

بسم الله الرحمن الرحيم 

والله مش عارفة أبتدي منين بس الظاهر اني باجي اكتب هنا بس لما يكون دمي فاير ومحروق ، دحكوا علينا ف يوم وليلة ولموهم كلهم ع السجن والوقتي بيقولولنا خلصت اللعبة اهو واتبسطوا شوية نخرجهم كلهم بقى ، وكأننا أطفال أو كأن الثورة مؤقتة نفرح بيها  شوية وبعديها " ترجع ريما لعادتها القديمة " .. يبقى لو كان كده من الاول كنتوا قولولنا وكان لزومه ايه التعب والشهدا ودمهم اللي عاوزينه يروح هدر ! 

مش عندي كلام خاص أقوله أكتر من اللي اتقال امبارح 
وأبدا 
بالبيان الصادر من الشعب 





قام المجلس الأعلى رد علينا بإنه مالوش دعوة بكل اللي حصل 


ونقلا عن مدونة " جبهة التهييس الشعبية

أحب أني أعيد نشر البوست ده " والله الموفق .. والبوستعان
دلالة مني على الموافقة على كل ما تم طرحه فيه 

وتأكيدا على مطالبنا 

1- اعادة اعتقال كل من افرج عنهم.. احنا في قانون طوارئ، ولا ايه؟
2- محاكمة مبارك عن جرائم القتل
3- فتح ملف كنيسة القديسين بشكل عاجل وفوري والتحقيق فيه.. والموضوع ده حيقضي على الطائفية خالص
ثبت براءة الاسلاميين من تفجير كنيسة القديسين، وتم الافراج عن كل المتهمين في القضية
طب الكنيسة دي انفجرت لوحدها؟ فيه بلاغ متقدم ان العادلي هو اللي فجرها، والصحف الاجنبية بتقول انه فجرها بناء على تعليمات من مبارك اللي اخد بدوره تعليمات من اسرائيل اللي كانت عايزة تضرب غزة
القضية لو اتحلت واتعمل فيها حكم مافيش حد حيتكلم عن فتنة طائفية تاني ابدا، لا المسيحيين حيتهموا المسلمين، ولا المسلمين حيقعدوا يدوروا للمسيحيين على اي غلطة عشان ما يحسوش انهم هم متهمين لوحدهم
ماهو خلينا نبقى صرحا، المسلمين بيعملوا كده في المسيحيين عشان حاسين انهم متهمين لوحدهم، والشهادة لله المسيحيين مش مقصرين في الموضوع ده، وكل ما بيتهموهم اكتر، كل ما المسلمين بينكشوا عليهم شعرهم اكتر، فالتانيين بينكشوا شعرهم عليهم راخرين لانهم بني ادمين مش كنب يعني.. وهكذا
حلوا لنا الموضوع ده من جدوره.. الاتنين اهبل من بعض وحيبوسوا بعض ويعيطوا لما كل واحد فيهم يعرف ان التاني مش متهم
4- تقديم مبارك الى محاكمة عسكرية بتهمة الخيانة العظمى
المشير طنطاوي في خطابه لدفعة الشرطة المتخرجة حديثا قال بالنص "طلب منا اننا نفتح النار على المتظاهرين وكان قرارنا بالاجماع لأ مش حنفتح النار على المتظاهرين" لا والشرطة صقفوا.. صقفوا للجيش عشان ما فتحش علينا النار وهم اللي نالوا لوحدهم شرف فتح النار علينا
5- الافراج عن كافة المعتقلين في حادث السفارة الاسرائيلي
6- الافراج عن كافة النشطاء اللي اتقبض عليهم في المحاكمة العسكرية.. خصوصا 

عمرو البحيري

7- وقف المحاكمات العسكرية للمدنيين بشكل فوري

.....

الشعب المصري 

0 comments: