Saturday, November 26, 2011

اسمعوني وساعدوني

بسم الله الرحمن الرحيم

ندخل على طول .. 

دلوقتي الناس انقسمت بين مقتنع بأن الانتخابات ضرورية ولازم نصوت علشان كده المجلس هيفقد شرعيته وعلشان ما نضيعش حقنا وبين ناس شايفة العكس تماما 
انا من الناس التانية اللي شايفة ان الانتخابات تحت اشراف العسكر اللي بنطالب بسقوطه ولا نعترف بشرعيته ما ينفعش تتم .. وفي ظل الظروف الحالية واللي حصل و و و ... رغم اني كنت من اسعد الناس اللي اخيرا هيبقى ليهم الحق ف التصويت .. كل ده قولته ف التدوينة اللي فاتت ، بس غرضي ف التدوينة  دي حاجة تانية خالص هاعرض فيها تساؤولات مختلفة ويمكن تعتبروها اسباب جديدة لامتناعي عن الانتخاب - غصب عني - ! 

مبدئيا لو انتخبت انا السنة دي هتبقى اول مرة انتخب في حياتي .. لاني مغتربة من مدة طويلة وكمان حصلت على حق الانتخاب من فترة قريبة 
اولا ما اعرفش ازاي انتخب ! 
ومحدش وجهنا هنا لآليات الانتخاب او طريقته 
واكيد في غيري وزيي كتير اوي 
ثانيا بقالي فترة بحاول ادور على اسماء المشرحين ف الدوائر بيتاعتي مش عارفة اوصل لهم 
والاسامي اللي نزلت ف الموقع هي اسماء المرحلة الأولى بس 
والنهاردة بس صديق ليا جابلي موقع المفروض اني اكتب فيه اسم المرشح - اللي انا معرفوش - علشان اشوفه بينتمي لاي دائرة 
طيب انا لو لقيت المرشحين واساميهم 
انا اصلا مش عارفة حد منهم - لاني ما عشتش ف مصر - هانتخب اي حد ؟
طيب فكرت ف الاسم اللي ببا عرضه عليا وقالي انه شخص كويس وان العيلة كلها هتنتخبه - بس انا معرفوش - ومعنديش استعداد انتخب سماعي ! 
طيب اعمل ايه ؟ 
ابطل صوتي ؟
ولا أقاطع ؟
وايه الفرق ؟
ناس تقولك لا ابطال الصوت مش هيكون فيه مجال للتزوير انما المقاطعة سهل يتزور فيها 
ازاي والصناديق هتقعد يومين اصلا .. يبقى حد يقنعني ان مافيش مجال للتزوير ! 
معنديش مشكلة في الشعب هيختار مين ولا عندي مشكلة ولا شك ف ارادة الشعب .. بس انا هاعرف منين ان النتيجة دي فعلا بارادة الشعب ام لا ؟ 
ولو افترضت ان الانتخابات مش هتتزور وهتكون نضيفة وشريفة وعفيفة .. انا انتخب مين .. اي شخص والسلام ؟ 

ده غير اني اصلا عرفت ان التصويت اتفتح لينا امبارح وبرده ما اعرفش ننتخب ازاي ولا نروح فين ناس بتقولي عن طريق البريد قولت افتح الموقع لقيته كاتبلي كده 

" [جاري تحديد مواقع لجان الاقتراع على الخريطة. برجاء متابعة الموقع حيث سيتم عرض مواقع اللجان على الخريطة قريباً] "


ولسة مستنية رغم انه خلاص تصويتنا قرب يخلص !

مش لاقية غير اني اقول ياريتهم ما فتحولنا التصويت كنا مش عارفين الاول .. وبعد ما فتحوه لنا برده مش عارفين ! 

..........

ياريت تناقشوني في اللي قولته ولو انا مش فاهمة حاجة او في حاجة غايبة عني توضحوهالي اكون شاكرة جدا 
...... 

داليا الأشقر 

Friday, November 25, 2011

بيان من المصريين بالخارج


بسم الله الرحمن الرحيم 


بداية .. 

نعتذر نحن " كمصريين بالخارج " عن عدم قدرتنا على التواجد في مصر في وقت كهذا مصر بحاجة لنا فيه كما نحن بحاجة لها ، إننا نبكي فراق الوطن وبعدنا عنه ، بل ويدمينا أحساسنا بالعجز أكثر من رصاص العسكر ! 


لا تتخيلوا كم كانت سعادتنا حينما علمنا أننا ولأول مرة سيكون لنا حق الانتخاب وسنصبح مصريين حقاً نستطيع إبداء آرائنا في مستقبل مصر، ولكن ماحدث في الأيام القليلة الماضية يجعلني - وكثيرين أخرين - نعيد النظر في هذا الحق وماهية التصويت والانتخابات بشكل عام 


ومن خلال رؤيتنا المحدودة في هذا الشأن قررنا الآتي : 

اننا سنمتنع عن الإدلاء بأصواتنا في حالة إقامة الانتخابات كتعبير عن رفضنا التام لما يقوم به النظام العسكري من ممارسات ضد حريتنا كمصريين وقتل لأخواننا الذين كان لابد أن نكون بينهم - ولكن تباً للظروف - وإنه لا فائدة من المشاركة في شيء لاقيمة له وترك ماهو أهم وهو حق شهدائنا وأخواننا الذين توفوا من قبل والآن فدماؤهم ليست رخيصة كي تذهب هدراً


نقاط ... إنتهى البيان 


مجموعة من المصريين بالخارج