Saturday, November 26, 2011

اسمعوني وساعدوني

بسم الله الرحمن الرحيم

ندخل على طول .. 

دلوقتي الناس انقسمت بين مقتنع بأن الانتخابات ضرورية ولازم نصوت علشان كده المجلس هيفقد شرعيته وعلشان ما نضيعش حقنا وبين ناس شايفة العكس تماما 
انا من الناس التانية اللي شايفة ان الانتخابات تحت اشراف العسكر اللي بنطالب بسقوطه ولا نعترف بشرعيته ما ينفعش تتم .. وفي ظل الظروف الحالية واللي حصل و و و ... رغم اني كنت من اسعد الناس اللي اخيرا هيبقى ليهم الحق ف التصويت .. كل ده قولته ف التدوينة اللي فاتت ، بس غرضي ف التدوينة  دي حاجة تانية خالص هاعرض فيها تساؤولات مختلفة ويمكن تعتبروها اسباب جديدة لامتناعي عن الانتخاب - غصب عني - ! 

مبدئيا لو انتخبت انا السنة دي هتبقى اول مرة انتخب في حياتي .. لاني مغتربة من مدة طويلة وكمان حصلت على حق الانتخاب من فترة قريبة 
اولا ما اعرفش ازاي انتخب ! 
ومحدش وجهنا هنا لآليات الانتخاب او طريقته 
واكيد في غيري وزيي كتير اوي 
ثانيا بقالي فترة بحاول ادور على اسماء المشرحين ف الدوائر بيتاعتي مش عارفة اوصل لهم 
والاسامي اللي نزلت ف الموقع هي اسماء المرحلة الأولى بس 
والنهاردة بس صديق ليا جابلي موقع المفروض اني اكتب فيه اسم المرشح - اللي انا معرفوش - علشان اشوفه بينتمي لاي دائرة 
طيب انا لو لقيت المرشحين واساميهم 
انا اصلا مش عارفة حد منهم - لاني ما عشتش ف مصر - هانتخب اي حد ؟
طيب فكرت ف الاسم اللي ببا عرضه عليا وقالي انه شخص كويس وان العيلة كلها هتنتخبه - بس انا معرفوش - ومعنديش استعداد انتخب سماعي ! 
طيب اعمل ايه ؟ 
ابطل صوتي ؟
ولا أقاطع ؟
وايه الفرق ؟
ناس تقولك لا ابطال الصوت مش هيكون فيه مجال للتزوير انما المقاطعة سهل يتزور فيها 
ازاي والصناديق هتقعد يومين اصلا .. يبقى حد يقنعني ان مافيش مجال للتزوير ! 
معنديش مشكلة في الشعب هيختار مين ولا عندي مشكلة ولا شك ف ارادة الشعب .. بس انا هاعرف منين ان النتيجة دي فعلا بارادة الشعب ام لا ؟ 
ولو افترضت ان الانتخابات مش هتتزور وهتكون نضيفة وشريفة وعفيفة .. انا انتخب مين .. اي شخص والسلام ؟ 

ده غير اني اصلا عرفت ان التصويت اتفتح لينا امبارح وبرده ما اعرفش ننتخب ازاي ولا نروح فين ناس بتقولي عن طريق البريد قولت افتح الموقع لقيته كاتبلي كده 

" [جاري تحديد مواقع لجان الاقتراع على الخريطة. برجاء متابعة الموقع حيث سيتم عرض مواقع اللجان على الخريطة قريباً] "


ولسة مستنية رغم انه خلاص تصويتنا قرب يخلص !

مش لاقية غير اني اقول ياريتهم ما فتحولنا التصويت كنا مش عارفين الاول .. وبعد ما فتحوه لنا برده مش عارفين ! 

..........

ياريت تناقشوني في اللي قولته ولو انا مش فاهمة حاجة او في حاجة غايبة عني توضحوهالي اكون شاكرة جدا 
...... 

داليا الأشقر 

3 comments:

Kareemoo-show said...

ما كل دا واضح يا داليا - فى الاول رفضوا يسمحوا للمصريين فى الخارج بالتصويت لحد ما المحكمة حكمت - ففتحوا باب التسجيل فى وقت غامض جدا ومحدش عرف فسجل 250 الف بس من 8 مليون - بعد كدا كمان عاملين اجراءات صعيه جدا ومافيش موقع عليه اسامى المرشحين - كل دا بيسكتوا الناس وخلاص عشان يقولوا اهو فتحنالكم الباب وبرضه محدش شارك

Alfred Erian said...

شوفى 2/3 مجلس الشعب حيبقا قوائم يعنى راى تختارى القائمة اللى حتنتخبيها الأول ودا سهل شوفى السايت بتاع كل حزب و قارنى و أختارى اللى يناسبك

الفردى بأه و لو انى مبفضلش الطريقة دى بس الظروف
شوفى 6 ، 7 من ناس تثقى فيهم و تعرفيهم لسه فى مصر و فى منطقتك و شوفيهم حيختاروا مين و ليه ، وليه مهمة جداً عشان من ليه تكونى صورة تقدرى تختارى منها الفردى

بالنسبة للخطوات و طريقة الأنتخاب دا السايت بتاع اللجنة العليا للأنتخابات حتلاقى فيه كل حاجة
http://www.elections2011.eg/

dr_________ said...

قصة انك تنتخبى او لا دى بتاعتك انتى ولازم تيجى من قنناعات جواكى ...اما هتنتخبى مين فى دايرتك فعادى جدا انك ممكن تاخدى براى حد ثقه زى والدك ..طالما لم تكونى فكره عن شخصيات اخرى يستحقون ان تعطيهم اصواتك ... مش هنتناقش فى اخطاء عملية التصويت لان دى تعتبر "بالنسبه لى " حاجه تافهه قصاد الاخطاء اللى ارتكبها المجلس العسكرى من قتل وسجن الثوره ...ربنا يوفقك للى فيه الخير ... ومش هاقولك انا هانتخب ولا لا :p